ஒரு காலத்தில் கோடம்பாக்கமே பள்ளமாகிற அளவுக்கு ஆடி தீர்த்தவர் அனுராதா. கதாநாயகி கனவோடு திரையுலகுக்கு வந்த அவரை ஒற்றை பாடலுக்கு பயன்படுத்திக் கொண்டது தமிழ்சினிமா. பிறகு சின்னத்திரை பக்கமாக ஒதுங்கிக் கொண்ட அவர், தான் அடையாத புகழை தனது மகளாவது அடைய வேண்டும் என்று விரும்பினார். எப்படியோ ‘பிரண்ட்ஸ்’ படத்தில் இரண்டாவது கதாநாயகியாக மகள் அபிநயஸ்ரீ யை அறிமுகப்படுத்தினார்.
ஆனால் காலம் போட்ட கால்குலேஷன் வேறு. அந்த படம் சூப்பர் ஹிட் ஆகியிருந்தாலும், அபிநயஸ்ரீ க்கு வாய்ப்புகள் இல்லை. கதாநாயகி கூட வேண்டாம். செகண்ட் ஹீரோயின் வேடமே போதும் என்று நினைத்தார். அதுவும் கை கூடவில்லை. பிறகென்ன? அம்மா வழியில் அயராத ஆட்டம்! குத்தாட்ட புகழ் நடிகையாகிவிட்டார். பழுத்த சினிமா அனுபவம் இருந்தும் தனது மகளை பெரிய நாயகி ஆக்க முடியவில்லையே என்ற கவலை இன்னும் இருக்கிறது இந்த லட்சிய அம்மாவுக்கு.
தானே முடிவெடுக்கிற வயது வந்ததும், கொஞ்சம் கொஞ்சமாக குத்தாட்டத்தை குறைத்துக் கொண்டார் அபிநயஸ்ரீ. தனது ஆட்டத் திறமையை பயன்படுத்தி முன்னணி நடன இயக்குனராக ஆக வேண்டும் என்ற முடிவுக்கு வந்திருக்கிறாராம். மார்கழி 16 என்ற படத்தில் நடன இயக்குனராக அறிமுகம் ஆகிறார் அபிநயஸ்ரீ. நடன இயக்குனர்களுக்கும் ரசிகர் மன்றம் வைக்கிற அளவுக்கு மக்கள் மத்தியில் பிரபலமாகி வருகிறது அந்த தொழில். ஏற்கனவே பிரபலமாகியிருக்கும் அபிநயஸ்ரீ தனக்கென்று பெரிய ரசிகர் வட்டாரத்தை வளைத்து போடுவார் என்பதை மட்டும் இப்போதே உறுதியாக நம்பலாம்!
-மனஸ்வினி
0 comments:
Post a Comment